پاکستان میں چین کے سفیر نونگ رونگ نے نیشنل ڈیزاسٹر اینڈ منیجمنٹ اتھارٹی (این ڈی ایم اے) کے چیئرمین لیفٹیننٹ جنرل انعام حیدر ملک سے ملاقات کی اورڈیزاسٹر مینجمنٹ میں تعاون پر تبادلہ خیال کیا۔
چینی سفیر نے پاکستان کے ساتھ ڈیزاسٹر مینجمنٹ کے منصوبوں کو وسعت دینے کا خیرمقدم کیا۔ انہوں نے باہمی تعاون کے مختلف پہلوؤں اور پاکستان میں ڈیزاسٹر مینجمنٹ کے فعال نقطہ نظر پر تبادلہ خیال کیا۔
سفیر نے ماحولیاتی تبدیلی سے پیدا ہونے والی ڈیزاسٹر مینجمنٹ کے مضبوط تعاون پر زور دیا اور پاکستان کے ساتھ موجودہ ورکنگ ریلیشن شپ کو مزید وسعت دینے پر زور دیا۔
انہوں نے این ڈی ایم اے اور ایم ای ایم کے درمیان دو طرفہ رابطے بڑھانے پر مزید زور دیا۔ دوسری جانب چیئرمین این ڈی ایم اے نے 2022 میں سیلاب کے دوران بچاؤ اور امدادی کارروائیوں میں چینی حکومت کی جانب سے بھرپور تعاون کا شکریہ ادا کیا۔
انہوں نے سیلاب سے متاثرہ علاقوں میں بحالی کے مرحلے کے لیے چین کی جانب سے جاری امداد کا بھی اعتراف کیا۔
لیفٹیننٹ جنرل انعام حیدر ملک نے مستقبل اور ٹیکنالوجی سے چلنے والے نیشنل ایمرجنسی آپریشن سینٹر (NEOC) تبدیلی کے منصوبے کی تفصیلات شیئر کیں جو تمام حکومتی اسٹیک ہولڈرز، انسانی ہمدردی کی ایجنسیوں اور بین الاقوامی ڈونرز کے ساتھ مربوط ہنگامی ردعمل کا انٹرفیس ہوگا۔
(سٹاف رپورٹ)
